ნოდარ ლადარიამ 1981 წელს დაამთავრა ივანე ჯავახიშვილის თბილისის სახელმწიფო უნივერსიტეტის ფიზიკის ფაკულტეტი. მუშაობდა ბირთვულ კვლევათა გაერთიანებულ ინსტიტუტში (დუბნა, რუსეთი) და მეცნიერებათა აკადემიის ფიზიკის ინსტიტუტში (თბილისი). 1989 წელს ჩააბარა თბილისის სასულიერო აკადემიაში, საიდანაც გარიცხეს 1992 წელს ურჩობისათვის. 1992 წლიდან სწავლობდა პონტიფიკალურ აღმოსავლურ ინსტიტუტში (ვატიკანი), სადაც 1994 წელს მიიღო ლიცენციატის, ხოლო 1996 წელს – დოქტორის სამეცნიერო ხარისხი. 1998 წლიდან ასწავლიდა იტალიურ ლიტერატურას ივანე ჯავახიშვილის სახელობის თბილისის სახელმწიფო უნივერსიტეტში. 2002 წლიდან იყო ენისა და კულტურის  ინსტიტუტის პროფესორი, ხოლო ამჟამად ილიას სახელმწიფო უნივერსიტეტიის სრული პროფესორია. 2008 წელს მიიღო იტალიის სახელმწიფო პრემია მხატვრული თარგმანისა და იტალიური კულტურის გავრცელებისათვის. სამეცნიერო ინტერესის სფეროებია გვიანი შუა საუკუნეების ისტორია და კულტურა, ამავე პერიოდის იტალიური ლიტერატურა.

თამარ ცოფურაშვილმა სადოქტორო დისერტაცია დაიცვა ბოხუმის რურის უნივერსიტეტში (გერმანია) DAAD-OSI-ის ერთობლივი სტიპენდიის ფარგლებში, შემდეგ კი პოსტ-სადოქტორო კვლევები განახორციელა შვეიცარიის ფრიბურგის უნივერსიტეტში და, როგორც მიწვეული მკვლევარი, პარიზის Foundation Maison des Sciences de l'Homme-ში. ამჟამად ილიას სახელმწიფო უნივერსიტეტის სრული პროფესორი და სავლე წერეთლის ფილოსოფიის ინსტიტუტის დირექტორია. გამოქვეყნებული აქვს გერმანულენოვანი მონოგრაფია მაისტერ ეკჰარტის შესახებ, სტატიები სამ ენაზე და კრებულები გერმანულ გამომცემლობებში. მისმა ორმა პროექტმა 2020 და 2023 გაიმარჯვა ოქსფორდის უნივერსიტეტის საგრანტო კონკურსში და ჯონ ტემპლტონის ფონდმა დააფინანსა. მისი სამეცნიერო ინტერესები მოიცავს ფილოსოფიის ისტორიას, შუა საუკუნეების ფილოსოფიას, ენის ფილოსოფიას, გერმანულ იდეალიზმს, რელიგიის ფილოსოფიასა და ეთიკას.

გიგა ზედანიამ 2005 წელს დაიცვა დისერტაცია თემაზე: "ნიკოლაუს კუზელი როგორც დიონისე ფსევდო-არეოპაგელის კომენტატორი" (ბოხუმის რურის უნივერსიტეტი, გერმანია). მანამდე ის სწავლობდა ფილოსოფიას, სოციოლოგიასა და კულტურის კვლევებს საქართველოში, აშშ-ში, უნგრეთსა და გერმანიაში.  2006 წლიდან არის ილიას უნივერსიტეტის პროფესორი. ინტერესის სფეროები მოიცავს ფილოსოფიის ისტორიას, ასევე ლიტერატურის, კინოს, განათლებისა და პოლიტიკის ფილოსოფიას. გამოქვეყნებული აქვს მრავალი პუბლიკაცია ქართულ, ინგლისურსა და გერმანულ ენებზე. 

ლევან ბერძენიშვილმა 1977 წელს დაამთავრა თბილისის სახელმწიფო უნივერსიტეტის კლასიკური ფილოლოგიის განყოფილება და 1991 წელს დაიცვა სადისერტაციო ნაშრომი მეცნიერებათა კანდიდატის წოდების მოსაპოვებლად. 1978 წლიდან თბილისის სახელმწიფო უნივერსიტეტში მუშაობდა უმცროსი მეცნიერ-თანამშრომლის პოზიციიდან ხმელთაშუა ზღვის კულტურების კვლევის ცენტრის ხელმძღვანელობამდე. შემდგომ წლებში ეკავა ფონდ „ქართუს" დირექტორის, ეროვნული ბიბლიოთეკის გენერალური დირექტორის და საქართველოს პარლამენტის წევრის თანამდებობები, სადაც განათლების კომიტეტს და ევროპასთან ინტეგრაციის კომიტეტს ხელმძღვანელობდა. არის რესპუბლიკური პარტიისა და რესპუბლიკური ინსტიტუტის დამფუძნებელი. მისი სამეცნიერო ინტერესები მოიცავს კლასიკურ ფილოლოგიას, ძველ ბერძნულ და ლათინურ ენებს და მსოფლიო ლიტერატურას.